2020 Thimnak le Tlangcung Party He Coalition Cozah Sernak Thlihran

Tlangcung party hna nih tukum thimnak ahcun coalition cozah sernak ding timhtuahnak an ngei. Azuam zong an i zuam i an thawng ngai tiah hmuh mi ansi (ANP, SNLD, CNLD, KSPP, etc.). Asinain, NLD nih 2020 thimnak ah landslide in teinak kan hmuh than lai i kanmah lawng nih cozah kan ser than lai tiah an rak ti lengmang cang ve. Asinain, kum 5 chung an riantuannak zok tikah mipi an phunzai cang (2015 lio an chim ningin thil kal khawh lo tikah). Cucaah, thimnak campaign thok hlan ah NLD nih party he minung he zoh ding tiah an chim. Campaign promise ningin thil a can khawh lo tikah mipi an phunzai ngai cang ahlei in khuapi um deuh middle class ansi bik – hi group nih hin NLD cozah si than seh ti an duh bik (rampi economy hi biapi ah ai tel aruang cu investor pawl caah stability le predictability hi abiapi tuk) nain NLD lawng nih cozah tlai kho hlah seh ti an duh fawn aruang cu power sharing um seh law decentralization le federal uknak phung aleng kho deuh lai tiah an zumh.

Party pakhat nih hip tukmi cozah hmuh an duh ti lo. Asinain, NLD nih 2015 thimnak bantukin 2020 thimnak zongah a minung zoh hlah uh a party in zoh rih ko uh tiah mipi sinah an chim than aruang cu ground level in candidate thimnak kongah siseh (minung tha), cun tlangcung party an thawng lai tiah an hmuh ve, observer tampi nih an chim fawn. Asinain, mipi hmuhning he cun ai dang kho ngai cang aruang cu mipi nih cuai an thlai khawh ngai cang hna – Phunghram zong remh khawh lo, remdaihnak zong tuah khawh lo, phunghram nih apekmi nawlngeihnak hman khawh lo tibantuk pawl ai tel (phunghram 261 thlen lo in tlangcung party hna nawlngeihnak pek khawhnak nawl an ngei ko nain).

4 Nov 2020, press conference ah President Office in U Zaw Htay nih national reconciliation kan tuahmi ah ai hmaithlak mi ah 2020 cozah cu “National Unity Government” achuak lai tiah achim. Mah biafang hi cozah an tlaih chungah avoikhatnak bik biafang an hmanmi asi. NLD CEC Dr. Myo Nyunt nih mah biafang a suallam cu 2020 hnu cun Hluttaw chungah tlangcung party hna he coalition kan tuah lai tinak asi ati. Mah bia an chimmi hi atu lio ralkap le NLD cozah karah bia entainak asan ngai lio ah ahung chuakmi bia asi ralkap nih thimnak kongkau ah UEC lawng siloin in cozah tlaimi nih tuanvo an ngeih hau lai anti (achuak dingmi result zong zohfel ngai hau lai anti).

Mah cu NLD nih an duh ve lo, ralkap chimmi hi civil servant law he ai kalh anti, cun ralkap nih phunghram ningin national politics ah kan ithlakmi asi anti ve than – Min Aung Hlaing cu Vice President dirhmun he ai khat anti rih. Ralkap lei nih thimnak tuah khawh lonak hmun an chimmi ah UEC nih zulh lo in NLD cozah duhning in an tuah tiphun in an ruah e.g NLD a dernak hmun ah thimnak tuah loin an thawnnak ding afiang deuhmi tu ah tuah an duh tiin an hmuh mi hna alo.

Tlangcung party dirhmun: 261 kongkau ah biaelnak atam ngai. Mah biaelnak cu USDP, NLD le ralkap kalak ah asi bik i, tlangcungmi hna hi game pakhat chungah celhmi menmen ah kan tla. Phunghram remh hlan paoh cu 261 remh awk tha lo anti fawn cucu asi kho fawn lo. Nizaan ah Min Aung Hlaing nih regional commander 20 tluk bia aronh hna mi cu thimnak tlamtlin khawhnak dingah nan zuam piak hna lai ati than ve – Ne Win nih 1960 ah arak chim bal ve. Tutan an bia-an zok tikah purh dah a har ngai. Asinain election cu tluangtlam tein kal kho seh timi an langhter duh – power an laak than lai cu ka zum lo asinain ramdang cozah nih free and fair election asi lo anti khawh men. UEC nih cancel a tuahnak hmun pawl kha tlangcung mi pawl umnak lawngte asi tikah tlangcung party kan sung ngai (atlawmbik seat 22). Asianain kawlrawnah NLD azuam cawhtu party pawl an um ve tikah tlangcung party hna nih seat 200 tluk an hmuh cun president thimnak ah aw-an ngeih khawh asi ve thiam.

Thimnak hlan le thimnak ni: NLD telh in party 4 nih Wa hmun zeimawzat ah cancel kan tuah piak uh tiah UEC sinah an chim aruang cu free and fair election asi kho lai lo anti. Ara lai mi caan zongah hibantuk aum kho rih cun thimnak tuah an timhnak hmun cheu khat ah buaibainak aum te kho e.g AA le ralkap ruangah Paletwa hi chim awk ahar ngai (adang hmunhma zong um kho rih mu e.g. Rakhine, Shan). Pakhat khat a can cun ho ruangah timi afiang te lai lo tiah ruah khawh asi an i puh veve te lai.

Kawlram thimnak ahhin 1990 thimnak hi ralkap dohnak ah rak hman asi bik i 2015 zong mah thiam asi ti khawh asi. Cucaah 2020 cu tlangcung party hna caah cun foundation chiah kum asi tiah ka ruah – seat tambik hmuh khawh cun atha tuk chinchin hnga. Atuning tein kan ramkhel a kal ahcun competitive election cu 2025 ahhin asi kho bik te lai tiah ka ruah. Cucaah, atu tein tlangcung party thawn khawh hi abiapit tuk lio caan asi. Kawl le Kawl karlak ah abiapi mi player kan si te kho men. 2020 thimnak cu tlangcung party hna thawn kum siseh ti saduhthahnak he..Salai Tluang Lian Hnin5 Nov 2020, Yangon Note: Acung ka tialmi hi keimah hmuhning lawng asi I adang pumpak siseh, bu siseh pehtlaihnak aum lo.

Be the first to comment

Leave a Reply

Your email address will not be published.


*